1 Feb 2024

தமுஎகச கலை இலக்கிய விருதுகள் 2023

01.02.2024

2023ஆம் ஆண்டுக்குரிய “தமுஎகச கலை இலக்கிய விருது”களுக்கான நூல்கள், ஆவணப்படங்கள் / குறும்படங்கள் வரவேற்கப்படுகின்றன. 2023ஆம் ஆண்டில் வெளியானவை மட்டுமே பரிசீலனைக்குரியவை. நூலின் மூன்று பிரதிகள் 2024 பிப்ரவரி 28ஆம் தேதிக்குள் அஞ்சல் / தூதஞ்சல் (கூரியர்) மூலம் அனுப்பப்பட வேண்டும். பரிசீலனைக்கு வரும் நூல்களைத் திருப்பி அனுப்ப இயலாது.

நூல்களை அனுப்ப வேண்டிய முகவரி:

பொதுச்செயலாளர், 
தமிழ்நாடு முற்போக்கு எழுத்தாளர் கலைஞர்கள் சங்கம், 
57/1, மேலப்பெருமாள் மேஸ்திரி வீதி,
(தமிழ்நாடு அரசு ஊழியர் சங்க அலுவலகம்) 
மதுரை- 625001  தொலைபேசி: 0452-2341669 


குறும்படங்கள் மற்றும் ஆவணப்படங்களின் தனிநபர் இணைய இணைப்புகளை 73730 73573 என்ற புலன எண்ணுக்கு அனுப்பிவைக்கவும். 

தேர்வாகும் நூல் / படம் ஒவ்வொன்றுக்கும் விருதுத்தொகை ரூ.10,000/,  சான்றிதழ்  ஆகியவை தமுஎகச நடத்தும் விழாவில் வழங்கப்படும். 

விருதுகள்

1. தோழர். கே. முத்தையா நினைவு விருது : தொன்மைசார்  நூல் 

2. கே.பி.பாலச்சந்தர் நினைவு விருது: நாவல் 

3. சு.சமுத்திரம் நினைவு விருது: விளிம்புநிலை மக்கள் குறித்த படைப்பு 

4. இரா. நாகசுந்தரம் நினைவு விருது: அல்புனைவு  (நான் ஃபிக்‌ஷன்) நூல் 

5. வெம்பாக்கம் ஏ.பச்சையப்பன் – செல்லம்மாள் (ப.ஜெகந்நாதன்) நினைவு விருது: கவிதைத்தொகுப்பு 

6. அகிலா சேதுராமன் நினைவு விருது: சிறுகதைத்தொகுப்பு 
7. வ.சுப.மாணிக்கனார் நினைவு விருது: மொழிபெயர்ப்பு 

8. இராஜபாளையம் மணிமேகலை மன்றம் (கொ.மா. கோதண்டம்) விருது:
 குழந்தைகள் இலக்கிய நூல்  

9. கு.சின்னப்பபாரதி அறக்கட்டளை விருது: மொழி வளர்ச்சிக்கு உதவும் நூல் 

10. பா.இராமச்சந்திரன் நினைவு விருது: குறும்படம் 

11. என்.பி.நல்லசிவம் - ரத்தினம் நினைவு விருது: ஆவணப்படம்


பின்வரும் விருதுகள் ஒவ்வொன்றுக்கும் பொருத்தமான பரிந்துரைகள் வரவேற்கப்படுகின்றன:   

12. மு.சி.கருப்பையா பாரதி - ஆனந்த சரஸ்வதி  விருது: 
நாட்டுப்புறக் கலைச்சுடர்

13. மக்கள் பாடகர் திருவுடையான் நினைவு விருது: இசைச்சுடர்

14. த.பரசுராமன் நினைவு விருது : நாடகச்சுடர்

15. மேலாண்மை பொன்னுச்சாமி நினைவு விருது: பெண் படைப்பாளுமை

வாழ்த்துகளுடன்,

மதுக்கூர் இராமலிங்கம், மாநிலத்தலைவர்

ஆதவன் தீட்சண்யா, பொதுச்செயலாளர்

15 Nov 2023

தோழர் என்.சங்கரய்யா மறைவுக்கு தமுஎகச புகழஞ்சலி

விடுதலைப்போராட்ட வீரர், இந்திய பொதுவுடமை இயக்கத்தின் மகத்தான தலைவர், தகைசால் தமிழர் தோழர் என்.சங்கரய்யா அவர்களின் மறைவுக்கு தமிழ்நாடு முற்போக்கு எழுத்தாளர் கலைஞர்கள் சங்கம் தன்னுடைய ஆழ்ந்த இரங்கலை தெரிவித்துக்கொள்கிறது. அவரது மறைவு முற்போக்கு கலை இலக்கிய உலகிற்கு பேரிழப்பாகும்.

எழுத்தாளர் கு.சின்னப்பபாரதி செம்மலர் இலக்கிய ஏட்டினைத் தொடங்குவதற்கு உந்துசக்தியாக இருந்தவர்களுள் தோழர் சங்கரய்யாவும் ஒருவர். செம்மலரில் எழுதிக்கொண்டிருந்த எழுத்தாளர்கள் 34பேர் 1974ஆம் ஆண்டு நவம்பர் மாதம் 23,24 தேதிகளில் மதுரையில் கூடி, தமிழ்நாடு முற்போக்கு எழுத்தாளர் சங்கத்தை உருவாக்குவது என்று முடிவு செய்தனர். இந்தக் கூட்டத்தில், தமிழக பொதுவுடமை இயக்கத் தலைவர்கள் தோழர்கள் எம்.ஆர்.வெங்கட்ராமன், ஏ.நல்லசிவன், கே.முத்தையா ஆகியோரோடு தோழர் என்.சங்கரய்யாவும் பங்கேற்று முற்போக்கு எழுத்தாளர்களுக்கு என்ற ஓர் அமைப்பினை உருவாக்கவேண்டும் என்ற ஆலோசனையை முன்வைத்தார். 1975ஆம் ஆண்டு ஜூலை 12, 13 தேதிகளில் மதுரையில் நடைபெற்ற தமுஎச முதல் மாநாட்டில் பங்கேற்று தோழர் சங்கரய்யா வாழ்த்துரை வழங்கினார். அப்போது அவர், “கடந்த காலத்தில் பல எழுத்தாளர் சங்கங்கள் அழிந்ததுபோல், இது அழிந்துவிடக்கூடாது என்றார்கள். இது அப்படி அழியாது. ஏனென்றால், இதற்கு தெளிவான கொள்கை அடிப்படை உண்டு” என்று முழங்கினார். முதல் மாநாட்டில் அவர் கூறியதுபோல, தமுஎகச தமிழகத்தின் மிகப்பெரும் கலை, இலக்கிய பண்பாட்டு அமைப்பாக உயர்ந்தோங்கி வளர்ந்து நிற்பது கண்டு அவர் பேருவகை கொண்டார்.
தமுஎகச நடத்திய பல்வேறு மாநில மாநாடுகளிலும், பயிலரங்குகளிலும் பங்கேற்று அவர் ஆற்றிய உரை தமுஎகச வளர்ச்சிக்குத் தடம் வகுத்து கொடுத்தது. 2022ஆம் ஆண்டு ஆகஸ்ட் 13, 14, 15 தேதிகளில் மார்த்தாண்டத்தில் நடைபெற்ற தமுஎகசவின் 15-வது மாநில மாநாட்டின் போது நாட்டு விடுதலையின் பவள விழாவையும் இணைத்துக் கொண்டாடினோம். இந்த மாநாட்டில், ஆக.14 அன்று நள்ளிரவு 12 மணிக்கு மாநாட்டில் ஏற்றப்படும் தேசியக்கொடியை தோழர் சங்கரய்யா எடுத்துக் கொடுத்தார். அவரால் எடுத்தளிக்கப்பட்ட அந்தக் கொடியே தமிழகம் முழுவதும் பயணித்து மாநாட்டில் ஏற்றப்பட்டது. இவ்வாறாக தமுஎகசவின் அனைத்து நிகழ்வுகளிலும் தம்மை அவர் நெருக்கமாக பிணைத்துக் கொண்டிருந்தார். 
 
சங்ககால இலக்கியம் முதல் சமகால இலக்கியம் வரை ஆழ்ந்த வாசிப்பு கொண்டிருந்த அவர், முற்போக்கு படைப்பாளர்களின் படைப்புகளை உடனுக்குடன் படித்து அவர்களை உற்சாகப்படுத்தி வந்தார். தலைசிறந்த பேச்சாளர்களில் ஒருவரான அவர், தன்னுடைய உரைகள் அனைத்திலும் நம்பிக்கை விதைகளை விதைத்து வந்தார். தமிழ்நாடு சட்டமன்றத்தில் தமிழ் ஆட்சிமொழி சட்ட உருவாக்கத்தின் போது அவர் நிகழ்த்திய உரைகள் தனிச்சிறப்பு வாய்ந்தவை. 
 
தமிழ்நாடு முற்போக்கு எழுத்தாளர் கலைஞர்கள் சங்கத்தை உருவாக்கித் தந்த ஆதி விதைகளில் ஒருவரான தோழர் சங்கரய்யாவுக்கு அமைப்பின் விழுதுகள் தமது வீரவணக்கத்தை தெரிவித்துக் கொள்கின்றன. சமநீதி, சமூக நீதி, படைப்பதற்கான பயணத்தில் தோழர் சங்கரய்யாவின் குரல் என்றென்றும் நம்மை வழிநடத்தும். தோழர் சங்கரய்யாவுக்கு வீரவணக்கம்.


தோழமையுடன்
மதுக்கூர் இராமலிங்கம், மாநிலத்தலைவர்  ஆதவன் தீட்சண்யா, பொதுச்செயலாளர்.
15.11.2023

10 Oct 2023

தமுஎகச மாநிலச்செயற்குழுக் கூட்டத்தின் தீர்மானங்கள்


2023 அக்டோபர் 7 அன்று தேனியில் மாநிலத்தலைவர் தோழர் மதுக்கூர் இராமலிங்கம் தலைமையில் நடைபெற்ற தமுஎகச மாநிலச் செயற்குழுக் கூட்டத்தில் நிறைவேற்றப்பட்ட தீர்மானங்கள் பின்வருமாறு: 

1. ஜனநாயகத்தின் தாயகம் இந்தியா என்று பீற்றிக்கொண்டே ஜனநாயகத்தைத் தாங்கும் தூண்களில் ஒன்றான ஊடகங்களை ஒடுக்கிவருவது தொடர்பாக மோடி அரசு உலகளாவிய கண்டனங்களைப் பெற்றுவருகிறது. ஆனாலும் அரசியல் சாசனத்தால் உறுதி செய்யப்பட்டுள்ள கருத்துவெளிப்பாட்டுச் சுதந்திரத்தைப் பறிப்பதில் ஒன்றிய அரசு மூர்க்கமாக ஈடுபட்டுள்ளது. ஒன்றிய அரசின் கொள்கைகள் மற்றும் செயல்பாடுகள் மீது மாற்றுக்கருத்தினை வெளிப்படுத்துகிற, கூர்மையாக விமர்சிக்கிற ஆளுமைகள் மீதும் ஊடகங்கள் மீதும் அமைப்புகள் மீதும் பொய்க் குற்றச்சாட்டுக்களைச் சுமத்தி ஒடுக்கும் இழிநிலை தொடர்கிறது. இதன் தொடர்ச்சியில் நியூஸ் க்ளிக் இணைய இதழை முடக்குவதற்கு ஒன்றிய அரசு மேற்கொண்டுள்ள நடவடிக்கைகளுக்கு தமுஎகச தனது வன்மையான கண்டனங்களைத் தெரிவித்துகொள்கிறது. கைது செய்யப்பட்டுள்ள நியூஸ் க்ளிக் ஆசிரியரை உடனே விடுவிப்பதற்கும், இதழை மீண்டும் சுதந்திரமாக  வெளியிடும் சூழலை உருவாக்குவதற்கும் குரலெழுப்புமாறு ஜனநாயகத்தில் நம்பிக்கை கொண்ட அனைவரையும் தமுஎகச கேட்டுக்கொள்கிறது. 

2. எழுபதாண்டுகளுக்கு முன்பு “மாற்றியமைக்கப்பட்ட தொடக்கக் கல்வி” என்கிற பெயரால் குழந்தைகளை குலத்தொழிலுக்கு விரட்டும் திட்டம் ராஜாஜியால் கொண்டுவரப்பட்டதென்றால் இப்போதைய ஒன்றிய அரசு 18 வயது நிரம்பியவர்களை குலத்தொழிலுக்கு விரட்டுவதற்கு “விஸ்வகர்மா யோஜனா” என்கிற திட்டத்தைக் கொண்டுவந்துள்ளது. 18 வகையான குலத்தொழில்களைச் செய்யும் குடும்பங்களிலிருந்து படித்து உயர்கல்விக்குச் செல்வதற்கு தகுதி படைத்தவர்களை படிக்க அனுப்பாமல், பயிற்சியும் கடனும் கொடுத்து அவர்களது குலத்தொழிலுக்கு திருப்பியனுப்புகிற இந்தத் திட்டம், சாராம்சத்தில் சாதியப் படிநிலைகளுக்கேற்பவே தொழில்களையும் பணிகளையும் ஒதுக்கும் வர்ணாஸ்ரமக் கோட்பாட்டிற்கு இசைவானது. வர்ணாஸ்ரமக் கோட்பாட்டினை எதிர்த்து வரலாறு நெடுகிலும் நடைபெற்றுவரும் போராட்டத்தால் பெண்களும் அடித்தட்டு மக்களும் நவீன வாழ்க்கைமுறையை நோக்கி அடைந்துவரும் முன்னேற்றத்தைப் பின்னுக்குத் தள்ளும் இந்தக் கொடுந்திட்டத்தை ஒன்றிய கைவிட வேண்டும் என்று தமுஎகச கோருகிறது. 

3. பல்வேறு தருணங்களில் கண்டனத்திற்குள்ளான போதும்  எய்ம்ஸ், ஐஐடி, ஐஐஎம் போன்ற உயர்கல்வி நிறுவனங்களில் நிலவும் சாதியப் பாகுபாடுகளும் ஒடுக்குமுறைகளும் முடிவுக்கு வந்தபாடில்லை. சமீபத்தில், மும்பை ஐஐடியில் பொதுவாக உள்ள உணவகப்பகுதியில் “தாவர உணவு” உண்போர் மட்டுமே அமர்வதற்கென தனியாக மேசைகள் ஒதுக்கப்பட்டு அவற்றை மற்றவர்கள் பயன்படுத்தக்கூடாதென தடுக்கப்பட்டுள்ளனர். “இறைச்சி உணவு” உண்போர் மீதான இந்தத் தீண்டாமையை கடைபிடிப்போர் மீது சட்டப்பூர்வ நடவடிக்கை எடுப்பதற்கு பதிலாக, அதற்கு எதிர்ப்பு தெரிவித்த மாணவர்களுக்கு பத்தாயிரம் ரூபாய் தண்டத்தொகை விதித்துள்ள மும்பை ஐஐடி நிர்வாகத்தின் போக்கினை தமுஎகச கண்டிக்கிறது. மேலும், உணவகத்தில் நிலவும் தீண்டாமைக்கு காரணமான அனைவர் மீதும் சட்டப்படியான நடவடிக்கை எடுக்கவேண்டுமெனவும் கோருகிறது.

4. மதுரை கலைஞர் நூற்றாண்டு நினைவு நூலகத்தில் உள்ள கூட்ட அரங்குகளை கலை, இலக்கிய, பண்பாட்டு நிகழ்வுகளுக்கு குறைந்த கட்டணத்தில் வழங்கிட ஆவன செய்யுமாறு தமிழ்நாடு அரசை தமுஎகச கேட்டுக்கொள்கிறது.   

வாழ்த்துகளுடன், 

மதுக்கூர் இராமலிங்கம், மாநிலத்தலைவர்

ஆதவன் தீட்சண்யா, பொதுச்செயலாளர்

19 Sept 2023

நூற்றாண்டு காணும் கவிஞர் தமிழ்ஒளி அவர்களைப் போற்றும் தமிழ்நாடு அரசின் அறிவிப்பு

தமுஎகச வரவேற்பு
 

19.09.2023
 

“தனிமுறையில் நான் உனக்குப் புதிய சொத்து” என்று தமிழ்ச்சமூகத்திற்கு தன்னை ஒப்பளித்த கவிஞர் தமிழ்ஒளி 1924 செப்டம்பர் 21 அன்று பிறந்தவர். நாளை மறுதினம் அவரது நூற்றாண்டு தொடங்குகிறது. பாரதி, பாரதிதாசன், பெரியார், ஜீவா ஆகியோரின் கருத்தியல்களால் ஈர்க்கப்பட்டு கலை இலக்கியத்தளத்திலும் அரசியலிலும் தீவிரமாக பங்காற்றியவர் கவிஞர் தமிழ் ஒளி. விடுதலைக்கு முந்தைய காலனிய இந்தியாவிலும் விடுதலைக்குப் பிந்தைய இந்தியாவிலும் வாழ்ந்த தமிழ்ஒளி தம் காலத்தின் அடித்தட்டு மக்களது வாழ்வியல் அவலங்களையும் அவற்றிலிருந்து விடுபடுவதற்கான அவர்களது எத்தனங்களையும் தனது இலக்கிய ஆக்கங்களில் முதன்மைப்படுத்தினார். சிறுகதை, குறுநாவல், நாடகம், காவியம், திரையிசைப் பாடல் என பன்முகப்பட்ட வடிவங்களிலும் இயங்கிய தமிழ்ஒளியின் படைப்புலகம் சாதியத்திற்கும் அனைத்து வகையான சுரண்டல்களுக்கும் எதிரானது. குழந்தைகளுக்காக  அவர் எழுதிய கதைகளும் பாடல்களும் இயற்கையை, மனித உழைப்பை, சமத்துவத்தை, அறவொழுக்கத்தை, அறிவியல் கண்ணோட்டத்தைக் கொண்டாடக்கூடியவை. மே தினத்தையும் சீனப்புரட்சியையும் வரவேற்று அவர் எழுதிய கவிதைகளும் கம்யூனிஸ்ட் கட்சி தடைசெய்யப்பட்ட காலத்தில் வெளிவந்த முன்னணி என்ற இதழில் வெளியான அவரது எழுத்துகளும் உழைப்பாளி மக்களால் என்றென்றும் போற்றத்தக்கவை. அகில இந்திய முற்போக்கு எழுத்தாளர் சங்கத்தின் அங்கமாக தமிழ்நாடு முற்போக்கு எழுத்தாளர் சங்கம் உருவானபோது அவ்வமைப்பில் தீவிரமாக செயல்பட்டவர் தமிழ்ஒளி. 
 
“தூக்குக்கயிற்றினைத் தொட்டிழுத்தாலும் துளியும் அஞ்சாதே! ஒளியிலா நாட்டில் ஒளியினைப் பாய்ச்சு” என்று அநீதிகளுக்கெதிராக போராடத் தூண்டிய தமிழ்ஒளியை தனது ஐம்பெரும் ஆளுமைகளில் ஒருவராக ஏற்றுக்கொண்டுள்ள தமுஎகச, தமிழ்ஒளியின் நூற்றாண்டு விழாவினை நூறு இடங்களில் நடத்துகிறது. கவிஞர் தமிழ்ஒளி நூற்றாண்டு விழாக்குழுவும் பல்வேறு நிகழ்வுகளை ஒருங்கிணைத்துவருகிறது. இதன் தொடர்ச்சியில்தான் தமிழ் ஒளியின் நூற்றாண்டை அரசு விழாவாக நடத்தவேண்டும் என்கிற கோரிக்கையும் எழுந்தது. இப்போது தமிழ்நாடு அரசு தஞ்சை தமிழ்ப் பல்கலைக்கழகத்தில் தமிழ்ஒளியின் மார்பளவு சிலையினை அமைக்க முன்வந்துள்ளது. மேலும், பள்ளி மாணவர்களின் தமிழ் ஆர்வத்தினை ஊக்குவிக்கும் வகையில், மாணவர்களுக்கு தமிழ் சார்ந்த போட்டிகள் நடத்தி கவிஞர் தமிழ்ஒளி பெயரில் பரிசுகள் வழங்க ரூ.50 இலட்சம் வைப்புத்தொகையாக வைக்கப்படும் என்றும் மாண்புமிகு முதலமைச்சர் அறிவித்துள்ளார். தமிழ்ச்சமூகத்திற்கு கலை இலக்கியம் வழியே மதிப்பார்ந்த பங்களிப்பினைச் செய்துள்ள கவிஞர் தமிழ் ஒளி அவர்களைப் போற்றும் விதமாக தமிழ்நாடு அரசு வெளியிட்டுள்ள இவ்வறிவிப்பினை தமிழ்நாடு முற்போக்கு எழுத்தாளர் கலைஞர்கள் சங்கம் வரவேற்கிறது.
 
அன்புடன்

மதுக்கூர் இராமலிங்கம், மாநிலத்தலைவர்          
ஆதவன் தீட்சண்யா, பொதுச்செயலாளர்
   

4 Sept 2023

அமைச்சர் உதயநிதி ஸ்டாலின் உரையைத் திரிக்கும் மோசடி

தமுஎகச கண்டனம்
 
தமிழ்நாடு முற்போக்கு எழுத்தாளர் கலைஞர்கள் சங்கம் 2023 செப்டம்பர் 2 அன்று சென்னையில் நடத்திய சனாதன ஒழிப்பு மாநாட்டில் அமைச்சர் உதயநிதி ஸ்டாலின் அவர்கள் ஆற்றிய உரையைத் திரித்து அவர் மீது அவதூறு பரப்புவோருக்கு தமுஎகச தனது கண்டனத்தை தெரிவித்துக்கொள்கிறது. 
 
உதயநிதி ஸ்டாலின் ஆற்றிய உரை உள்ளிட்டு மாநாட்டின் நிகழ்வுகள் அனைத்தும் காணொலியாக சமூக ஊடகங்களில் காணக்கிடைக்கிறது. அவற்றை காணும் எவரொருவரும் இந்த மாநாட்டின் எந்தவொரு நிகழ்வும், யாருடைய உரையும் குறிப்பிட்ட சாதிக்கோ மதத்திற்கோ எதிராக அல்லாமல், பிறப்பின் அடிப்படையில் மக்களைப் பாகுபடுத்தி ஒடுக்கிவருகிற சனாதனக் கருத்தியலை ஒழிக்கவேண்டும் என்றே அமைந்திருக்கிறது என்பதை உணரமுடியும். 
 
மாநாட்டில், ஆன்மீகப்பற்றுடைய அய்யா சத்தியவேல் முருகனார், இறை நம்பிக்கைக்கும் சனாதனத்துக்கும் எந்த தொடர்புமில்லை என்று பேசியதுடன் சனாதனம் இழைத்த அநீதிகளை எடுத்துரைத்தார். கர்நாடத்தில் இயங்கிவரும் தேவதாசி ஒழிப்புச் சங்கத்தின் மாநிலச்செயலாளர் மாலம்மா, சிறுமிகள் தேவதாசிகளாக ஆக்கப்பட்டு பாலியல் சுரண்டலுக்கும் வன்கொடுமைக்கும் ஆளாக்கப்படுவதற்கு அடிப்படையாக உள்ள சனாதனத்தை ஒழிக்கவேண்டும் என்று கள அனுபவத்திலிருந்து ஆவேசமாக எடுத்துரைத்தார். இவர்கள் பேசியதற்கெல்லாம் பதில் சொல்ல இயலாத பாஜகவினர், சனாதனக் கருத்தியலை ஒழிக்கவேண்டும் என்று உதயநிதி பேசியதை “சனாதனத்தைப் பின்பற்றும் மக்களை ஒழிக்கவேண்டும்” என்று அவர் பேசியதாக திரித்து அரசியல் ஆதாயத்திற்காக மோசடிப்பிரச்சாரம் செய்துவருகின்றனர். இந்த மோசடியையே ஆதாரமாக வைத்துக்கொண்டு டெல்லியிலும் பீஹாரிலும் அவர் மீது புகாரளித்துள்ளனர். அவர் தனது கருத்தை திரும்பப்பெற வேண்டும் என்றும் மன்னிப்பு கோரவேண்டும் என்றும் கொக்கரிக்கின்றனர். இதற்கெல்லாம் பயந்து சனாதன ஒழிப்புப் பற்றி தான் தெரிவித்த கருத்தினை திரும்பப்பெறப் போவதில்லை என்று உறுதிபட அறிவித்துள்ள உதயநிதி ஸ்டாலின் அவர்களுக்கு பாராட்டுதல்களை தெரிவித்துக் கொள்கிறது தமுஎகச. 
 
அலைபேசி மூலமாகவும் சமூக ஊடகங்கள் வழியாகவும் தனக்கு வரும் மிரட்டல்களைக் கண்டு தான் அஞ்சப்போவதில்லை என்று சனாதன ஒழிப்பில் தனக்குள்ள உறுதிப்பாட்டை வெளிப்படுத்திவரும் தமுஎகச மாநிலத் துணைத்தலைவரும் மாநாட்டின் வரவேற்புக்குழுத் தலைவருமான திரைக்கலைஞர் ரோஹினி அவர்களுக்கும் பாராட்டுகள். 
 
சனாதன ஒழிப்பு என்று பேசத் தொடங்கியதற்கே சனாதனவாதிகளின் மனம் புண்பட்டுவிட்டது என்று கூப்பாடு போடுகிறவர்களுக்கு, சனாதனத்தினால் தலைமுறை தலைமுறையாக அநீதிக்காளாகியிருக்கும் கோடானுகோடி மக்களின் குமுறலில் இருந்தே சனாதனம் ஒழிக என்கிற முழக்கம் உயிர்த்தெழுந்துள்ளது என்கிற உண்மையை உணர்த்தும் பணியை தமுஎகச தொடர்ந்து மேற்கொள்ளும். 
 
தோழமையுடன்
மதுக்கூர் இராமலிங்கம், மாநிலத்தலைவர்

ஆதவன் தீட்சண்யா, பொதுச்செயலாளர்

04.09.2023

சனாதன ஒழிப்பு மாநாடு - தீர்மானங்கள்

சனாதன ஒழிப்பு மாநாடு


2023 செப்டம்பர் 2, காமராசர் அரங்கம், சென்னை


தீர்மானங்கள்


1. மனிதர்களை பிறப்பின் அடிப்படையில் பாகுபடுத்தும் வர்ணாஸ்ரமக் கோட்பாட்டை தொகுத்தெழுதிய மநுவின் சிலை ராஜஸ்தான் உயர் நீதிமன்றத்தின் ஜெய்ப்பூர் அமர்வாய வளாகத்தில் 1989ஆம் ஆண்டு முதல் இருப்பது அரசியல் சட்டத்தின் மாண்புகளுக்கு விரோதமானது. எனவே அதை உடனடியாக அகற்ற வேண்டும்.

2. அரசியல் சட்டத்தின் நோக்கங்களை நிறைவேற்றுவதற்காக இயங்க வேண்டியவையே அரசு அலுவலகங்கள். எனவே அனைத்துவழிகளிலும் மதச்சார்பின்மையைக் கடைபிடிப்பது அவசியம். தமிழ்நாட்டைப் பொறுத்தவரை இதுகுறித்து தெளிவான அரசாணைகள் இருந்தும் அரசு அலுவலகங்களில் சரஸ்வதி பூசை, ஆயுத பூசை, பூமி பூசை, புதிய கட்டிடத் திறப்புக்கு புண்ணியார்த்தனம், யாகங்கள், வார இறுதிப் பூசை, விநாயகர் சதுர்த்தி போன்ற ஒரு மதத்தின் சார்பான நிகழ்வுகள் தொடர்ந்து நடைபெறுகின்றன. இப்படியான பூசைகள் மூலம் பார்ப்பனியச் சடங்குகளின் பிடியில் அரசு அலுவலகங்கள் சிக்குண்டு கிடக்கின்றன. பெரும்பான்மையாக உள்ளவர்களின் மத நடவடிக்கைகள் இயல்பானவை என்கிற நிலையை உருவாக்குவது அரசியல் சட்டம் உயர்த்திப்பிடிக்கும் மதச்சார்பின்மைக்கு எதிரானது. எனவே இத்தகைய நடவடிக்கைகள் உடனடியாக தடுக்கப்படவேண்டும்.

3. அரசு அலுவலக வளாகங்களுக்குள் எந்தவொரு குறிப்பிட்ட மதம் சார்ந்த வழிபாட்டிடத்தையும் அரசு அலுவலகம் நிர்வாகிக்கக் கூடாது. புதியதாக எந்தவொரு வழிப்பாட்டுத்தலம் அமைப்பதையும் அனுமதிக்கக்கூடாது.

4. இறை நம்பிக்கை, மத ஈடுபாடு என்பவை குடிமக்களின் தனிப்பட்ட விருப்பம். அரசைப் பொறுத்தவரை மதச்சார்பற்றது. எனவே, மதம் சார்ந்த எந்த நிகழ்வுகளிலும் அமைச்சர்களோ அரசு அலுவலர்களோ ஊழியர்களோ அவர்களுடைய பணிசார்நிலையில் கலந்து கொள்ளக்கூடாது. அனைத்து மக்களுக்குமான இவர்கள் தமது சொந்த சாதி அமைப்புகளின் நிகழ்வுகளில் பங்கெடுப்படுப்பதும் கூடாது.

5. வாழ்விடங்களும் வழிபாட்டிடங்களும் சாதி அடிப்படையில் பிரிந்திருப்பதைப் போலவே மயானங்களும் பிரிந்திருக்கின்றன. இந்தப் பிரிவினையின் காரணமாக சமரசம் உலாவும் இடம் எனச் சொல்லப்படும் மயானங்களிலேயே கடும் மோதல்கள் உருவாகின்றன. இந்நிலையைத் தவிர்க்க எல்லா ஊர்களிலும் பொது மயானம் அமைக்கப்பட வேண்டும். ஒரு ஊர் ஒரே சுடுகாடு/ இடுகாடு என்கிற நிலை எட்டப்பட வேண்டும். அதற்கான மன ஏற்பை வளர்க்க மக்களிடையே பரப்புரை மேற்கொள்ளப்பட வேண்டும்.

6. சனாதனத்தின் கோரவடிவமான சாதியம் நீடித்திருப்பதன் முதன்மைக் காரணியாக இருப்பது அகமணமுறையாகும். நாட்டில் சாதி கலப்புத் திருமணம் மிகக்குறைவாக நடக்கக்கூடிய மாநிலங்களில் ஒன்றாக தமிழ்நாடு இருப்பது கவலையளிக்கக் கூடியதாகும். சாதிய அமைப்புகள் தம் சாதி இளைஞர்களிடம் குறிப்பாக பெண்களிடம் வேறு சாதியினரை திருமணாம் செய்துகொள்ளமாட்டேன் என்று கோவிலில் வைத்து வெற்றிலைச் சத்தியம் வாங்குவது போன்ற நடவடிக்கைகளின் மூலம் வாழ்க்கைத்துணையை சுதந்திரமாக தேர்ந்தெடுக்கும் உரிமையை தடுத்துவருகின்றன. சாதியாணவக்கொலைகள் மூலம் சாதி கலப்ப்பு/ மறுப்புத் திருமணத்தின் மீது அச்சம் உருவாக்கப்படுகிறது.

அகமண முறையை விட்டுவிடுதலையாகி வெளியேற விரும்புவோர் கைக்கொள்ளும் நடைமுறைதான் சாதிமறுப்புத் திருமணம். இதனைப் பெற்றோரும் உறவினர்களும் எதிர்ப்பது மட்டுமின்றி வாடகைக்கு வீடுதர மறுப்பது உட்பட பல வகையில் புறக்கணிக்கும் நிலை உள்ளது. திருமணப் பதிவிலும் ஏராளமான இடையூறுகள், கடுமைகள். இவையெல்லாம் சாதியத்தைக் கெட்டிப்படுத்துவற்கான திட்டங்களே.

எனவே, சாதி, மத மறுப்புத் திருமணம் செய்துகொள்வோரின் அச்சம் அகற்றும் வகையில் பாதுகாப்பு ஏற்பாடுகளுடன் அரசே காதலர் புகலிடங்களை உருவாக்க வேண்டும். அவர்களை சாதி/சமய மறுப்பாளர் என அறிவித்து அவர்களின் குழந்தைகளுக்குக் கட்டாய, கட்டணமில்லா கல்வி வழங்கி வேலைவாய்ப்பிலும் முன்னுரிமை அளிக்க வேண்டும்.

7. குடும்பங்களில் தான் அதிகமும் பார்ப்பனியச் சடங்குகள் நடக்கின்றன. குடும்பங்களில் உரையாடி இச்சடங்குகளை நிறுத்தினாலே பார்ப்பனியத்தின் உயிர்நாடியான சடங்குகள் அழிந்துவிடும்.

8. பார்ப்பனியச் சடங்குகளுக்கு மாற்றாக புதிய பண்பாட்டு வாழ்க்கை நெறிகளையும் கொண்டாட்டங்களையும் உருவாக்குவதற்கு தமிழர் பண்பாட்டில் தோய்ந்த வல்லுநர் குழு அமைக்கப்பட வேண்டும்.

9. பெயர் சூட்டும் விழா பொதுவாக பார்ப்பனச்சடங்குகளின்றியே நடைபெறுகிறது என்றாலும் பெயர்கள் அனைத்தும் சமஸ்கிருத மயமாக மாறிக்கொண்டு இருக்கின்றன. தமிழ்ப்பெயர்களைச் சூட்ட வேண்டும்.

10. புதுமனை புகுவிழாக்களில் நடக்கும் கணபதி ஹோமம் என்ற பார்ப்பனச் சடங்கு வீட்டின் தீட்டைக் கழிக்கும் சடங்கு அனைத்து சாதியினரும் சேர்ந்து கட்டிய வீடு தீட்டுப்பட்டது என்று அந்த தீட்டை கழிக்கும் சடங்காகவே, புனிதப்படுத்தும் சடங்காகவே நடக்கிறது என்பதால் அந்த சடங்கைத் தவிர்த்து புதுமனை திறப்பு விழா என்று நடத்தலாம்.

11. பூப்புனித நீராட்டு விழா என்ற சடங்கினை நடத்த நடத்த வேண்டிய அவசியமே இல்லை. பெண்குழந்தைகள் பருவமடைவதை தீட்டாகப் பார்த்து தீட்டு கழிக்கும் இந்தப் பார்ப்பனியச் சடங்கினை கைவிட வேண்டும்.

12. இறப்புச் சடங்குகள் முழுக்கவும் இறப்பு என்கிற இயற்கை நிகழ்வை தீட்டு எனக் கருதி பார்ப்பனியச் சடங்கினால் புனிதப்படுத்தப்படுவதாக நடக்கின்றன. மரணம் தீட்டானதல்ல என்றும் உடல் தானம் செய்வதை ஊக்கப்படுத்தியும் பரப்புரை மேற்கொள்வதன் மூலம், இந்தச் சடங்குகளில் பெரும்பாலனவற்றை தவிர்க்க முடியும்.


29 Aug 2023

பொது நூலகத்துறையை விழுங்கும் மோசடிகள்!

-தமுஎகச கண்டனம்
 
தமிழறிஞர்கள் எழுதிய நூல்களை வேறொருவர் பெயரிலும், ஒரே நூலை வெவ்வேறு ஆசிரியர்/ பதிப்பகங்களின் பெயர்களிலும் வெளியிட்டு நூலக ஆணை பெற்றிருக்கும் மோசடி தற்போது அம்பலமாகியுள்ளது. நூலகத்துறையை பணமீட்டும் குறுக்கு வழியாக கருதும் சில பதிப்பாளர்கள் பொது நூலகத்துறையின் அதிகாரிகளை உடந்தையாக்கிக்கொண்டே இந்த மோசடியைச் செய்திருக்கமுடியும். கடைசி பத்தாண்டுகளில் பெருமளவில் நடந்துள்ளதாக தெரியவரும் இதுபோன்ற மோசடிகளால் நூலகங்கள் குப்பைக்கிடங்கின் நிலைக்கு தரமிறக்கப்பட்டுள்ளன. இதேநிலை தொடருமாயின், நூலகத்தின் மீதான நம்பகம் பாதிக்கப்படுவதுடன் வாசகர்களின் ஆர்வமும் குன்றிப்போகும் கெடுநிலை வரக்கூடும். நூலகத்துறையை உள்ளிருந்து அரித்துத் தின்னும் இந்தக் கரையான்களுக்கு கண்டனத்தை தெரிவிப்பதுடன், இவர்கள்மீது பொது நூலகத்துறையும் தமிழ்நாடு அரசும் விசாரணை மேற்கொண்டு நடவடிக்கை எடுக்குமாறு தமுஎகச கேட்டுக்கொள்கிறது.
 
நூலக ஆணைக்காக ஒதுக்கப்படும் நிதியை குறிப்பிட்ட  சில பதிப்பகங்கள் குறுக்கு வழியில் நூலக ஆணை பெற்று அபகரித்துவிடுகின்றன என்கிற குற்றச்சாட்டு நீடிக்கும் நிலையில் இப்போது இம்மாதிரியான புதுவகை மோசடியும் வெளிச்சத்திற்கு வந்துள்ளது. பொது நூலகத்துறை ஆண்டுதோறும் வெளியாகக் கூடிய புதிய நூல்களை குறிப்பிட்ட காலவரையறைக்குள் மிகுந்த வெளிப்படைத் தன்மையுடனும் பாரபட்சமற்றும் தெரிவுசெய்து நூலக ஆணை வழங்கவேண்டும் என்று எழுத்தாளர்களும் பதிப்பாளர்களும் எழுப்பிவரும் கோரிக்கையுடன் தமுஎகச ஒன்றுபடுகிறது.  
பொருளாதார நிலை, அணுகும் வாய்ப்பு உள்ளிட்ட பல காரணங்களால் சொந்தமாக நூல்களை வாங்கிக்கொள்ள முடியாத மாணவர்கள், ஆய்வாளர்கள், படிப்பாளிகள் என பலரும் மேலதிகத் தேவைகளுக்காக நூலகங்களையே பெரிதும் சார்ந்துள்ளனர்.  இத்தேவையை நிறைவு செய்யும்விதமாக அரசு நூலகங்களும் தனியார் நூலகங்களும் பெரும்பங்காற்றும் தனித்துவத்தைக் கொண்ட தமிழ்நாட்டின் நூலகக் கட்டமைப்பினை ஊழலும் பாரபட்சமும் அற்றதாக வலுப்படுத்துவதற்கு பொது நூலகத்துறையும் தமிழ்நாடு அரசும் தீவிர நடவடிக்கை எடுக்கவேண்டுமென தமுஎகச வலியுறுத்துகிறது. 
 
தோழமையுடன்,

மதுக்கூர் இராமலிங்கம், மாநிலத்தலைவர்  
 
ஆதவன் தீட்சண்யா, பொதுச்செயலாளர்

29.08.2023
 

13 Jul 2023

பிளவுவாத அரசியலுக்கு எதிராக ஒன்றுபடுவோம்!

பொது சிவில் சட்டம் பற்றி 12.07.2023 மாலை இணையவழியில் தமுஎகச மாநிலக்குழு நடத்திய தெளிவரங்கில் நிறைவேற்றப்பட்ட தீர்மானம்:

பொது சிவில் சட்டத்திற்கான கருத்துக்கேட்பு என்ற பெயரில் ஒன்றிய பாஜக அரசு பன்மைத்துவ இந்தியா எனும் தேன்கூட்டின் மீது கல்லெறிந்து மீண்டும் களேபரத்தைத் துவக்கியுள்ளது. அயோத்தியில் பாபர்மசூதியை இடித்த இடத்தில் ராமருக்குக் கோவில் கட்டுவது, ஜம்மு காஷ்மீர் மாநிலத்திற்கு சிறப்புச் சலுகை வழங்கும் அரசியல் சட்டத்தின் 370வது பிரிவை ரத்து செய்தது ஆகிய ஆர்எஸ்எஸ் நிகழ்ச்சிநிரல்களை நடைமுறைப் படுத்திக்கொண்டிருக்கும் ஒன்றிய அரசு அடுத்து சனாதனக் கூட்டத்தின் திட்டமான பொது சிவில் சட்டத்தை திணிக்க முயற்சிக்கிறது. இது சிறுபான்மை மக்கள், பழங்குடி மக்களுக்கு மட்டும் எதிரானது அல்ல. இந்துக்களுக்கும் எதிரானது. பொது சிவில் சட்டத்திற்கு வடகிழக்கு மாநிலங்களைச் சேர்ந்த பழங்குடி மக்கள் குழுக்களும் சீக்கியர்கள் பார்ஸிகள் உள்ளிட்ட பல்வேறு மதத்தினரும் எதிர்ப்பு தெரிவித்து வருகின்றனர். பொது சிவில் சட்டம் என்பது இந்தியாவின் பன்மைத்துவத்திற்கு முற்றிலும் எதிரானது ஆகும்.
மனுஸ்மிருதி உள்ளிட்ட சனாதனச் சட்டங்களில் குற்றங்களுக்கான தண்டனைகூட ஒரே மாதிரியாக இல்லை, சாதி மற்றும் பாலினத்தின் பெயரால் தண்டனையின் அளவு தீர்மானிக்கப்பட்டுள்ளது. மனு அநீதியை மனதுக்குள் மறைத்துவைத்து பூசிப்பவர்கள்தான் அனைவருக்கும் பொது சிவில் சட்டம் என்று வாய்ப்பந்தல் போடுகின்றனர். 
 
இன்றைக்கு இந்தியாவில் குற்றவியல் உள்ளிட்ட பெரும்பாலான சட்டங்கள் அனைவருக்கும் பொதுவானதாகவே உள்ளன. மக்களின் வாழ்வியல் மற்றும் பண்பாட்டுக்கூறுகளை மனதில் கொண்டே அரசியல் சட்டத்தை உருவாக்கியவர்கள் சில சட்டங்களில் விதிவிலக்குகளை அனுமதித்துள்ளனர். ஆனால் ஆர்எஸ்எஸ் பரிவாரம் இந்துச் சட்டங்களையே பொது சிவில் சட்டம் என்ற பெயரில் அனைவர் மீதும் திணிக்கத் துடிக்கிறது.
2024ஆம் ஆண்டு நாடாளுமன்றத் தேர்தல் நெருங்குகிற நிலையில், அனைத்துத் துறைகளிலும் தோல்வியடைந்துள்ள நரேந்திர மோடி அரசு மக்களின் கவனத்தை திசை திருப்பும் குறுகிய அரசியல் நோக்கு அடிப்படையிலேயே பொது சிவில் சட்டம் குறித்த விவாதத்தை மீண்டும் துவக்கியுள்ளது.
 
இதே ஒன்றிய அரசினால் 2018ஆம் ஆண்டு அமைக்கப்பட்ட 21ஆவது சட்ட ஆணையம் இப்போதுள்ள சூழலில் பொது சிவில் சட்டம் அவசியமும் அல்ல, விரும்பத்தக்கதும் அல்ல என்று அறிவித்துவிட்ட நிலையில், 2ஆவது சட்ட ஆணையம் கருத்துக்கேட்பு என்ற பெயரில் மீண்டும் சர்ச்சையை துவக்கியுள்ளது. 
 
நாடாளுமன்றம் மற்றும் சட்டமன்றங்களில் பெண்களுக்கு 33 சதவீத இடஒதுக்கீட்டை நடைமுறைப்படுத்த கடந்த ஒன்பது ஆண்டுகளில் ஒரு துரும்பைக்கூட கிள்ளிப்போடாத நரேந்திர மோடி அரசு பெண்களின் நலனை பாதுகாப்பதற்காகவே இந்தச் சட்டத்தை கொண்டுவரப்போவதாக கூறுவது கேலிக்கூத்தாகும். 
 
பாலினச் சமத்துவத்தை உறுதிசெய்யும் வகையிலான சட்டங்களை கொண்டுவரவேண்டிய அவசியமுள்ளது. அதற்கான விழிப்புணர்வும் கருத்தியல் பரப்புரையும் தொடர்ந்து முன்னெடுக்கப்பட வேண்டும். ஆனால் பெண்ணடிமைத்தனத்தை பெரிதும் பற்றிநிற்கும் சனாதனவாதிகளால் அதைச் செய்யமுடியாது. அதனாலேயே ஒன்றிய அரசு முன்வைக்கப் போவதாக சொல்லும் பொது சிவில் சட்டம் அதற்கு எந்தவகையிலும் உதவாது என்பதை இந்தத் தெளிவரங்கம் சுட்டிக்காட்டுகிறது. 
 
இவண்,
 
மதுக்கூர் இராமலிங்கம்,
மாநிலத்தலைவர்.                  

ஆதவன் தீட்சண்யா
பொதுச்செயலாளர்
                                                                                                                                                                               

21 Jun 2023

தமிழ்நாட்டில் பயிற்றுவிக்க இந்தியும் சமஸ்கிருதமும் படித்தவர் எதற்கு?

- தமுஎகச கண்டனம்
 
தமிழ்நாடு அரசு எம்.ஜி.ஆர் திரைப்படம் மற்றும் தொலைக்காட்சிப் பயிற்சி நிறுவனம்,  பகுதிநேர கெளரவ விரிவுரையாளர் பணிக்கு ஆளெடுப்பது தொடர்பான  விளம்பரம் ஒன்றை இன்று நாளேடுகளில் வெளியிட்டுள்ளது. இந்தப் பணியில் சேர்வதற்கான கல்வித்தகுதி பற்றிய குறிப்பில் தமிழ், ஆங்கிலம், இந்தி, மற்றும் சமஸ்கிருதம் ஆகிய மொழிப்பாடங்களில் முதுநிலை அல்லது எம்.பில்., பட்டம் பெற்றிக்கவேண்டும் எனக் குறிப்பிடப்பட்டுள்ளதற்கு தமுஎகச வன்மையான கண்டனங்களைத் தெரிவித்துக்கொள்கிறது. 
 
தமிழ்நாட்டில் இயங்கும் இந்த நிறுவனத்தில் பயிற்றுவிக்க தமிழும் ஆங்கிலமும் படித்தவர்களே போதுமானதாயிருக்கும் நிலையில் இந்தியையும் சமஸ்கிருதத்தையும் முதுநிலை/ எம்.பில்., படித்தவர்களை பணியமர்த்தும் இம்முயற்சி தமிழ்நாடு அரசின் மொழிக்கொள்கைக்கு எதிரானது. எனவே தற்போதைய விளம்பர அறிவிக்கையை வெளியிட்டவர்கள் மீது தக்க நடவடிக்கை எடுப்பதுடன் அதனை திரும்பப்பெற வேண்டும் என்றும் தமிழ்நாடு அரசை தமுஎகச கேட்டுக்கொள்கிறது.       

தோழமையுடன்
மதுக்கூர் இராமலிங்கம், மாநிலத்தலைவர்          

ஆதவன் தீட்சண்யா, பொதுச்செயலாளர்

21.06.2023

8 Jun 2023

தமுஎகச நடத்தும் சனாதன ஒழிப்பு மாநாடு

இலச்சினை  வரையும் போட்டி
 
சனாதன தர்மம் என்பது இந்தியாவில் குடியேறிய ஆரியர்களுக்குரியது; அது நான்கு வேதங்கள், நான்கு ஸ்மிருதிகள், இரண்டு இதிகாசங்கள், பதினெட்டு புராணங்கள் ஆகியவற்றில் தனிநபர், குடும்பம், சமூகம் சார்ந்து சொல்லப்பட்டுள்ள சட்டங்கள், ஒழுங்குகள், மதிப்பீடுகள், கடமைகள் ஆகியவற்றைப் பின்பற்றி வாழும்படி வற்புறுத்துகிறது. இதற்கேற்ப புனையப்பட்ட உயர்வுXதாழ்வு, புனிதம்Xதீட்டு எனும் கற்பிதங்கள் வழியே சமூகத்தைக் கூறுபோட்டு ஒருவரையொருவர் சமமற்ற விதமாக நடத்துவதற்குரிய வழிமுறைகளையும்- அவற்றை மீறுவோரை ஒடுக்குவற்கான தண்டனைகளையும் கொண்ட கொடிய சட்டத்தொகுப்பான சனாதன தர்மம், பின்னாளில் இந்தியர்கள்  அனைவர் மீதும் திணிக்கப்பட்டு இன்றளவும் நீடிக்கிறது.
 
எல்லாவகையான பாகுபாடுகளுக்கும்  ஒடுக்குமுறைகளுக்கும் அடிப்படையான சனாதனத்தை எதிர்த்து வரலாறு நெடுகிலும் நடைபெற்றுவரும் போராட்டங்களால் தான் இந்தியச்சமூகம் சமத்துவத்திற்கான பாதையில் ஓரளவேனும் முன்னேறிக் கொண்டிருக்கிறது. வரவேற்கத்தக்க இம்முன்னேற்றம் தொடரவேண்டுமானால், சனாதனம் எவ்வடிவில் வெளிப்பட்டாலும் அதனை முறியடிக்க வேண்டியது அவசியமாகிறது. 
 
சனாதனம் என்கிற சொல்லையே அறிந்திராதவர்கள் மனதில்கூட சனாதனம் பரப்பியுள்ள நச்சுக்கருத்தியல் ஊடுருவியுள்ள ஆபத்தை உணர்ந்துள்ள தமுஎகச, அவர்களை மனித நிலைக்கு மீட்பதை தனது பணிகளில் ஒன்றாக கருதுகிறது. அதன்பொருட்டு, சனாதன ஒழிப்பு மாநாட்டினை சென்னையில் 2023 ஆகஸ்டில் நடத்தவுள்ளது. இம்மாநாட்டின் கருத்தியலை கலைநேர்த்தியுடன் வெளிப்படுத்தும் “இலச்சினை”யை வரைந்தளிக்கும் போட்டியில் பங்கெடுக்குமாறு அனைவரையும் கேட்டுக்கொள்கிறது தமுஎகச. 
தெரிவாகும் சிறந்த இலச்சினை, மாநாட்டிற்கான அனைத்து விளம்பரங்களிலும் செய்திகளிலும் பயன்படுத்தப்படும். பரிசுத்தொகை ரூ.10,000/ (ரூபாய் பத்தாயிரம் மட்டும்) மாநாட்டில் வழங்கப்படும். போட்டியில் பங்கேற்கும் அனைவருக்கும் சான்றிதழ் மின்னஞ்சலில் அனுப்பி வைக்கப்படும். 
 
இலச்சினையை 20.06.2023 ஆம் தேதிக்குள்  அனுப்பவேண்டிய மின்னஞ்சல் முகவரி: thamueakasa2014@gmail.com 
 
அன்புடன்
மதுக்கூர் இராமலிங்கம், மாநிலத்தலைவர்       

ஆதவன் தீட்சண்யா, பொதுச்செயலாளர்

08.06.2023